Chelsea Oo Soo Afjartay Guulo La’aantii LIXDA Ciyaarood Ee Xidhiidhka Ahaa, Xilli Uu Fofana La Baxsaday Graham Potter

 

Kooxda kubadda cagta Chelsea ayaa gaadhay guusheedii koowaad muddo toddoba ciyaarood ah iyaga oo soo afjaray inkaartii goolal la’anta iyo guulo la’aanta ahayd ee ay in muddo ah la daalaa-dhacayeen.

Gool madi ah oo uu u dhaliyey difaaca reer France ee Wesley Fofana ayaa Chelsea siiyey guul ay aad ugu baahnaayeen oo ay ku xidhnayd shaqada tababare Graham Potter, waxaanay sidaas kusoo afjareen lix ciyaarood oo guulo la’aan ahaa, halka ay sidoo kalena u tahay guushii saddexaad ee 17kii ciyaarood ee ugu dambeeyey ay gaadheen.

45 daqiiqadood oo niyad jab ahaa kaddib, Chelsea ayaa xaqiijisatay guul ayaa heshay gool ka badbaadiyey qalbi-jabkii muddada ay kusoo jireen, waxaana geesigooda noqday Fofana oo la kulmay kubbad uu soo dhigay Ben Chilwell.

Xiddiga reer Germany ee Kai Havertz ayaa u dhowaaday inuu hoggaanka u dhiibo kooxdiisa Chelsea qaybtii hore isaga oo goolka la hortegay kubbad difaacyahannada loo dhaafiyey hase yeeshee waxa ka badbaadiyey goolhye Meslier oo ka leexiyey goolka.

Kooxda martida ahayd ee Leeds United ayaa heshay fursado aanay ka faa’iidaysanin iyaga oo kubbadahoodu ku lumayeen marka ay xerada ganaaxa la galaan sidoo kalena uu goolhaye Kepa taxadar badan ka samaynayey oo uu la socday dhaqdhaqaaqa weeraryahannada Leeds United.

Daqiiqaddii 53aad ayay Chelsea u dabbaal-degtay gool ay muddo raadinayeen oo uu Westley Fofana u saxeexay, kaddib markii uu madax ku qabtay koorne uu soo qaday Chilwell.

Goolkan ayaa noqday midkii koowaad ee uu Fofana ka dhaliyo horyaalka Ingiriiska ee Premier League, waxaana markiiba si degdeg ah usoo noolaatay niyadda ciyaartoyda Chelsea ee sii dumaysay.

Graham Potter ayaa la hadlay ciyaartoydiisa isaga oo dhiirigelinaya maadaama ay ciyaartan ku xidhnayd shaqadiisu, waxaana isaga oo u muuqday inuu ku qanacsan yahay goolkaas uu xoojistay khadka dhexe.

Raheem Sterling iyo Joao Felix oo ay ciyaartu ku adkayd ayaa baxay qaybtii labaad, waxaana soo galay Denis Zakaria iyo Gallagher oo abuuray hab-difaac iyo maamulka kubadda oo kooxdoodu kusoo noolaatay.

Natiijadan ayaa ka dhigan in Chelsea ay yeelatay 34 dhibcood, laakiin waxay wali ku jiraan kaalinta tobnaad ee miiska kala-sarraynta horyaalka Premier League.

Leeds United ayaa iyaduna u dhaadhacday khadka cas iyadoo fadhida kaalinta 17aad oo ay ku haysato 22 dhibcood.