WARKII LA SUGAYEY: Sergio Busquets Oo Go’aankii La Sugayey Ka Gaadhay Barcelona

 by:Mohamed Caddan

Xiddiga khadka dhexe ee Barcelona ee Sergio Busquets ayaa gaadhay go’aankii mustaqbalkiisa ee muddada laga sugayay, waxaana uu ku wargeliyey Xavi Hernandez iyo Joan Laporta in uu shandaddiisa xidh-xidhan doono marka uu dhamaado xilli ciyaareedkan socda.

Sergio Busquets oo ay da’diisu tahay 34 jir, walina xubin muhiim ah ka ah kooxdiisa oo uu 29 ciyaarood oo dhamaan tartamada ah u saftay xilli ciyaareedkan, ayaa waxa uu qandaraaskiisu ku egyahay dhamaadka xilli ciyaareedkan.

Kooxdiisa ayaa doonaysa inuu sii joogo sannad kale, laakiin waxa uu Sergio Busquets ku adkaystay in uu ka tegi doono Camp Nou marka uu dhamaado xilli ciyaareedkan soda, sid uu qoray wargeyska El Nacional ee kasoo baxa waddanka Spain.

Warka yaa intaa ku daray, in laacibkani uu warkiisa u caddeeyey Joan Laporta iyo Xavi oo ay si toos ah u kulmeen, taas oo ku qasbaysa Blaugrana inay suuqa iibka ciyaartoyd ee xagaaga ay la saxeexato kubbad-burburiye dabiici ah.

Tababare Xavi oo dhowaan la hadlayay wariyeyaasha ayaa sheegay in ay si wada jir ah u shaqaynayaan oo ay isku dayayaan inay ku qanciyaan Busquets inuu sii joogo, laakiin go’aanka iyo waxa uu yeelayo ay u taallo ciyaartoyda maadaama uu qandaraaskiisu dhamaad yahay.

Kooxda horyaalka Maraykanka ee Inter Miami ayaa si aad ah loola xidhiidhinayaa, hase yeeshee waxa kale oo iyaguna jira dalabyo ka imanaya waddanka Sucuudiga.

Sergio Busquets oo kulankiisii koowaad u saftay Barcelona sanndkii 2008, ayaa waxa uu illaa hadda u dheelay 709 kulan taas oo ka dhigaysa inuu yahay ciyaartoyga saddexaad ee kulamadii ugu badnaa u ciyaaray Barcelona, waxaana kaliya ka horreeya Lionel Messi oo 778 ciyaarood u saftay iyo Xavi Hernandez oo 767 ciyaarood dheelay.